我的韓國男友(三) 家人篇

記得澳洲一簽完左之後, 我去左釜山玩幾日, 個o個星期日Oppa帶我去佢由細到大都會一家人去既教會. (佢屋企幾代都係基督徒)

個日佢既父母係台上有份唱聖詩, 而我在台下好努力望住個螢光幕, 即使個時韓文根本勁差, 都出晒腦汁咁去試讀同扮好投入咁唱歌. 之後牧師開始講道, 我一句都聽唔明, 幾咁眼訓又早起身, 又未食早餐, 真係想合埋隻眼, 但係我又知佢父母係台上一定望住我地, 所以我狂用手指甲針自己大脾, 等自己唔好合埋眼.




個兩粒鐘真係超大壓力, 話晒都係第一印象, 廢事衰啦. 教會結束之後, 我地就去左附近一間傳統韓國餐廳食午餐. 除左見面, 講左句"안녕하세요. 처음 뵙겠습니다"之外,之後既時間都係Oppa同佢屋企人傾計,而我負責賣笑.有時佢屋企人都會同我傾計,問我問題,不過都係佢地同Oppa講韓文,Oppa再翻做英文話我知.

Oppa媽問: 做韓國女人好辛苦嫁喎, 佢話佢知香港女仔好大小姐, 通常都係d男人做晒, 問我如果搬黎韓國住捱唔捱到, 識唔識煮飯. 哇, lee個問題真係考起我, 捱唔捱倒真係唔知, 捱唔到係咪可以隨時返香港.

 好在Oppa又話平時係澳洲都係我煮飯, 仲識煮韓食. 之後Oppa媽就開始講: 同外國女仔一齊, 要諗好多野, 唔係剩係Oppa一個人問題, 而係成個家族問題等. 又要顧埋我地如果有小朋友, 個小朋友唔似韓國人點算. 同埋Oppa媽又問我地打算幾時結婚, 唔可以一直咁working holiday周圍去.

最後係我身材唔高, 佢媽咪好擔心如果生左個小朋友唔高點算.我聽完以上Oppa翻譯返比我知既內容後, 真係唔小心講左句: 咁不如你娶個韓國小姐啦. 好在Oppa爸對我評價又幾好, 唔知點解會覺得我善良, 同可愛, 仲話睇得出我有一顆真心愛佢個仔.

咁我其實係下年諗住去韓國, 但到宜家都心大心細去首爾自己一個闖下, enjoy下一個人生活定係去釜山同Oppa一齊住, 講真我真係未有心理準備面對佢屋企人.

我: 如果下年我黎到, 你媽咪都係唔想你同外國人一齊點算?  如果我唔適應韓國既生活點算?
Oppa: 咁我地私奔返返黎澳洲啦